Deputeti i PD-së, Ervin Salinaji në një deklaratë për mediat është shprehur se PD ka denoncuar ditën e djeshme drejtorin e ri të Policisë së Fierit, Andon Markos.
Sipas Salianjit, Marko duhet të burgoset për dëshmi të rreme, pasi ka dijeni për skemën e blerjes së dëshmitarit të rremë në dosjen Xhafaj kundër qeverisë.
“Ne bëmë publike dje 5 përgjime, që faktojnë se Andrea Marko, në detyrën e nëndrejtorit të Policisë së Fierit i shërben dëshmitarit të sajuar të qeverisë dhe e mban me para atë që të dëshmojë kundër opozitës, në mbrojtje të narkopushtetit politik të Ramës.
Nga përgjimet faktohet se Drejtori i ri i Policisë së Fierit jo vetëm ka dijeni për skemën e blerjes së dëshmitarit të rremë të qeverisë, por se ai e ka takuar disa herë atë. Kjo e bën shefin e ri të Policisë së Fierit një mashtrues, që duhej arrestuar menjeherë për dëshmi të rreme”, deklaroi Salianji.
Më tej, Salianji u shpreh se Andon Marko ka deklaruar në prokurori se me Fredi Alizotin, dëshmitarin e rremë, është takuar vetëm 1 herë, mirëpo, sipas tij përgjimet e djeshme provojnë se ai është takuar disa herë me Alizotin dhe ka folur dhjetëra herë nga qershori në tetor.
“Sot Andon Marko duhet të ishte shkarkuar nga Policia si punonjës i padenjë i saj, si bashkëpunëtor i banditëve dhe trafikantëve, por në shtetin bandit të Edi Ramës Andon Marko gradohet në postin e Drejtorit të Policisë së Fierit, si shpërblim për pjesëmarrjen në skemën e shpikjes së dëshmitarit të rremë për llogari të “Shefit të Madh” në Tiranë”, tha Salianji.
