Dy forcat politike opozitare, Partia Demokratike dhe Lëvizja Socialiste për Integrim kanë arritur paktin e parë në Kuvend.
Këto të fundit kanë rënë dakord që një prej tre komisioneve parlamentare që i kishte Partia Demokratike t’i kalojë LSI-së.
Kryetarja e LSI-së, Monika Kryemadhi dhe nënkryetari i PD-së, Edmond Spaho, kanë negociuar mbrëmë lidhur me këtë temë. Demokratët kanë pranuar të tërheqin emrin e Bardh Spahisë si kryetar i Komisionit të Shëndetësisë, për t’ia lënë këtë pozicion Petrit Vasilit.
Ndërkohë PD-ja do të mbajë drejtimin e dy komisioneve të tjerë, Genc Pollon te Integrimi dhe Albana Vokshin te Mediat.
Kryetarja e LSI, Monika Kryemadhi do të jetë anëtare e Komisionit të Jashtëm, ndërsa Endrit Brahimllari do të jetë pjesë e Komisionit të Sigurisë Kombëtare.
Në Komisionin e Ekonomisë janë caktuar deputetët Edmond Haxhinasto, Përparim Spahiu, dhe Gledion Rehovica, ndërsa Shezai Rrokaj dhe Klejdi Mehmetaj do jenë në Komisionin e Arsimit.
