Ish- deputeti i Partisë Demokratike, Astrit Patozi ka ironizuar sërish me kryeministrin Edi Rama për emërimin e 12 prefektëve të rinj. Patozi thotë “falë Zotit jetojmë në kohë paqeje, sepse nëse vendi do të binte në luftë (larg qoftë) Edi Rama mund të na emëronte gjeneralë të gjithë ish-prefektët, duke përfshirë këtu edhe Keltis Krujën”
Pasditen e djeshme, kryeministri Edi Rama emëroi 12 prefektët e rinj. Kryeministri tha se ata janë ish-ushtarakë të lartë. “Prefektët e rinj janë përzgjedhur nga radhët e ushtarakëve të lartë që nuk janë pjesë aktive e Forcave të Armatosura”, tha Rama.
Postimi i plotë i Patozit
Emërimi i 12 prefektëve të rinj, të gjithë ish-ushtarakë të kujton atë anekdotën e atij që shkoi ne librari dhe porosoti 3 metra libra jeshilë se i shkonin me mobiljet e bibliotekës së shtëpisë.
E kam thënë edhe një herë tjetër, se janë dy personazhe në Shqipëri, për të cilët nuk ka asnjë rëndësi ajo që ndodh, por vetëm mënyra se si duhet treguar. Njëri prej tyre është Edi Rama.
Falë Zotit jetojmë në kohë paqeje, sepse nëse vendi do të binte në luftë (larg qoftë) Edi Rama
mund të na emëronte gjeneralë të gjithë ish-prefektët, duke përfshirë këtu edhe Keltis Krujën.
Kjo që shkrova nuk ka të bëjë aspak me respektin tim të palëkundur për ish- ushtarakët.
