Deputeti demokrat Astrit Patozi, i bëri thirrje sot kryetarit të PD-së Lulzim Basha, që brenda kësaj jave t’i japë fund asaj që e quajti legjendë, mundësisë për bashkëqeverisje me PS-në pas zgjedhjeve të 25 qershorit.
Sipas tij, nëse kjo situatë nuk do të qartësohet brenda kësaj jave, që është fundit para zgjedhjeve, atëherë kostoja për PD-në do ishte e pallogaritshme dhe përgjegjësia do të binte mbi Bashën.
Patozi foli më konkretisht për pasojat, kur tha se situata e krijuar në tregun politik do të krijojë mundësinë e kalimit të drejtuesve lokal të PD-së tek PS-ja, duke iu referuar mundësisë për bashkëqeverisje PD-PS.
Nga ana tjetër ai bëri të qartë pozicionin e tij në raport me PD-në, teksa qartësoi se do të vijonte të ishte deputet i kësaj force deri në shtator, kur përfundon mandati zyrtarisht, dhe se marrëdhënia e tij me PD-në nuk varej nga humori i Bashës.
Ai shprehu mirënjohje ndaj PD-së e cila i besoi tre herë mandatin e ligjvënësit.
