Deputeti i Partisë Demokratike, Astrit Patozi i cili u la jashtë listave për deputet nga Lulzim Basha nëpërmjet një statusi në “Facebook”, ai është shprehur se Shqipëria duhet të marrë leksion nga zgjedhjet e djeshme në Kosovë.
Patozi u shpreh se Kosova refuzoi dje koalicionin e madh politik, si një amnisti për korrupsionin, dhe votoi si parti të parë opozitën e vërtetë dhe pa maskë.
Në këtë status patozi mundohet të përcjellë mesazhin se edhe një koalicion I madh I mundshëm PS-PD mund të jetë i gabuar dhe i pa votuar nga populli.
Satusi i Patozit ne Facebook
KOSOVA REFUZOI KOALICIONIN E MADH
Kosova votoi dje në mënyrë të qetë dhe të qytetëruar, duke na dhënë një leksion të mirë demokracie, 2 javë para se të mbahen zgjedhjet tona. Duke e konsideruar këtë si një sukses të ri në rrugën e shtetndërtimit, uroj shumë që të paktën shembulli i standardeve zgjedhore të ndiqet edhe prej nesh më 25 qershor.
Megjithëse duket sikur kanë rënë arsyet e mëdha që zgjedhjet në Shqipëri të kontestohen, ende nuk ka garanci të plota se do të kemi realisht një proces të lirë dhe të ndershëm, siç me të drejtë po kërkohet prej shumë vitesh.
Natyrisht, që i takon politikanëve të Prishtinës të lexojnë me vëmendje dhe maturi rezultatin dhe pas kësaj të marrin vendimet e duhura për t’i dhënë Kosovës sa më shpejt qeverinë e së ardhmes. Mendoj se nuk na takon ne, as të debatojmë, e aq më pak të bëjmë tifo për votën e ndarë të bashkëkombasve tanë përtej kufirit.
Ajo që duket me sy të lirë që tani është fakti se Kosova nuk ka një fitues të qartë dhe se me shumë gjasa ajo do të qeveriset nga aleancë e re.
Por në rast se do të më kërkohej një opinion i shkurtër dhe modest për sa ndodhi, do të thoja se Kosova refuzoi dje koalicionin e madh politik, si një amnisti për korrupsionin, dhe votoi si parti të parë opozitën e vërtetë dhe pa maskë.
Shpresoj shumë që ky mesazh i pastër të mbërrijë dhe të përcillet siç duhet edhe në Shqipëri. Ndryshe, do të na duhet ta nisim nga e para edhe ne si Kosova.
