Astrit Patozi ka shpallur nga Korça ‘‘Lëvizjen për Ringritjen e Partisë Demokratike’’. Në një takim që ka zhvilluar me demokratët e Korçës, Patozi ka theksuar se kjo lëvizje synon të ringrejë këtë forcë politike për ta bërë atë të përgjegjshme përballë elektoratit të vet.
“Nëse nisma jonë do kishte një emër, do i vendosnim ‘Lëvizja për Ringritjen e Partisë Demokratike’ dhe këtë po e them për herë të parë në Korçë. Ne jemi të gjithë bashkë dhe kjo është PD që nuk pranon mosmbajtejen e përgjegjësisë dhe mospasjen e një gare të drejtë’’, u shpreh Patozi.
Ai shpjegoi se e gjithë kjo lëvizje synon t’i kundërvihet Partisë Socialiste që është në pushtet dhe për këtë Patozi u shpreh se është i gatshëm të bashkëpunojë edhe me Bashën për ringritjen e PD-së. ‘‘Ne jemi etiketuar si kundërshtarët e Lulzim Bashës, por ne jemi kundërshtarët e PS-së, pasi Lulzim Basha është njëri prej nesh dhe jemi gati të punojmë edhe me të për ringritjen e PD. PD nuk ka vdekur”- tha ai.
Patozi vuri në dukje gjithashtu se është gati të marrë një vendim tjetër nëse Basha ndërpret garën të cilën ai e etiketoi se farse. “Unë jam gati të marr një vendim tjetër edhe pse kemi ndërmarrë këtë nismë, nëse kjo garë për kreun e PD ndërpritet. Ne nuk kemi ardhur për kryetarin, por për PD. PD jeni ju në këtë sallë. Forcën duhet ta marrin anëtarët dhe jo një njeri i vetëm. Është mungesa e lidershipit tonë që i dha Ramës atë rezultat”- tha Astrit Patozi.
