Një shqiptar është vlerësuar me çmimin “Oscar” në Itali, për shkak të kontributit që ka dhënë në mënyrë vullnetare për mjedisin.
Saimir Dashi, i cili jeton prej vitesh në Livorno është vlerësuar me çmimin “Oscar” në Itali për kontributin që ka dhënë në mjedis. Ai kishte ndërmarrë nismën e bukur sociale dhe ekologjike duke pastruar vullnetarisht detin. Ideja për të pastruar qytetin e Livornos lindi në një kohë kur kishte mbetur pa punë.
“Kjo ka ndodhur kur qëndrova pa punë për një kohë dhe lindi ambicia për ambientin, dhe fillova dhe jam këtu ku jam sot, merrem me pastrimet“, tha ai.
“Unë do të mundohem në pjesën time, për sa kam mundësi, që të jap një lloj mësimi, të transmetoj se për çfarë bëhet kjo”.
Në pak javë, Saimiri, i njohur dhe si “Pastruesi vullnetar i detit” tërhoqi vëmendjen e autoriteteve vendase, të cilët e vlerësuan me çmimin “Oscar” për vullnetarizëm. Ai madje ka shpikur dhe një pajisje për të mbledhur bishtat e cigareve.
Në një intervistë që dha për emisionin “Abc-ja e mëngjesit”, ai tha se për të nuk kanë vlerë çmimet, por mesazhi që iu përcjell njerëzve për të mbrojtur mjedisin.
