Në një kohë kur koronavirusi është shndërruar në një pandemi botërore, Organizata e Kombeve të Bashkuara u ka bërë thirrje qeverive, që të mos harrojnë ata që janë pas hekurave.
Komisionerja e Lartë e OKB për të Drejtat e Njeriut, Michelle Bachelet, u shpreh gjatë një deklarate se nuk duhen lënë pas dore as të burgosurit, dhe as personat që punojnë në këto institucione. Sipas saj, pasojat e neglizhimit të tyre janë potencialisht katastrofike.
“Qeveritë po përballen me kërkesa të mëdha për burime në këtë krizë, dhe duhet të marrin vendime të vështira. Por unë i nxis të mos harrojnë ata që ndodhen pas hekurave, ose personat e mbyllur në vende të tilla si institucione të shëndetit mendor, shtëpi të moshuarish dhe jetimore, sepse pasojat e neglizhimit të tyre janë potencialisht katastrofike”, u shpreh Bachelet.
Për të shmangur një katastrofë të mundshme, Komisioneria e Lartë e OKB për të Drejtat e Njeriut, sugjeroi uljen e numrit të personave në paraburgim dhe të ekzaminojnë mënyrat për të liruar të paraburgosur veçanërisht të cenueshëm, si ata që janë më të vjetër ose të sëmurë.
Bilanci i të prekurve në botë nga koronavirusi po rëndohet çdo ditë e më shumë. Më të prekurat janë Italia dhe Spanja, ndërsa Kina pa parë përmirësim. Amerika në gjendje të vështirë pasi atje Covid-19 po përhapet me shpejtësi. OBSH parashikoi se SHBA-ja do të jetë epiqendra e radhës.
