Në kohën kur largimet nga Shqipëria junë masive dhe askush nuk e kthen me kokën pas, qeveria mendon se duhet të krijohen ligje për të angazhuar të rinjtë në vendimmarrje.
Shqiptarët ndoshta për herë të parë po bëjnë një revolucion në heshtje. Thuajse të gjithë të rinjtë po braktisin vendin. Këtë here ata nuk kërkojnë më azil në Evropë pasi e dinë mirë që nuk mund ta përfitojnë. Ata largohen dhe kërkojnë punë duke pranuar dhe të qëndrojnë pa letra vetëm të jenë larg Shqipërisë (lajmin e plotë lexoje këtu).
Ndërkohë sot zëvendësministri Shpat Kolëgega bëri të ditur se Ministria e Arsimit Sportit dhe Rinisë ka ngritur një grup punë për hartimin e projektligjit. Ndër të tjera ligji parashikon rolin vendimmarrës së të rinjve në pushtetin lokal.
“Strukturat lokale do të kenë program dhe buxhet për rininë. Ligji synon të rregullojë edhe aspekte të tjera për të rinjtë për sa i përket punësimit, për sa i përket pjesëmarrjes së të rinjve në vendimmarrjen lokale që për fat të keq sot na mungon,” deklaroi Kolëgega.
Brenda këtij viti, Ministria e Arsimit Sportit dhe Rinisë synon të përfundojë hartimin e ligjit. Kolgega bëri me dije edhe prioritetet për vitin 2018 si shtimi i qendrave rajonale rinore dhe zhvillimin e Panairit Evropian të Organizatave Rinore.
