Komisioni i Pavarur i Kualifikimit ka shkarkuar nga detyra edhe gjyqtaren Alma Liçaj. Kjo e fundit, njësoj si Ramadan Troci, kishte probleme me pasurinë duke mos e kaluar procesin e Vettingut.
Kështu, KPK vendosi shkarkimin nga detyra për kryetaren e Gjykatës së Apelit në Vlorë. Licaj u akuzua për fshehje dhe mungesë burimesh financiare për pasurinë e saj që përbëhet nga një shtëpi dhe 5 apartamente në Vlorë dhe Tiranë-ndërsa ajo preferoi të shmangte shpjegimet duke i qëndruar argumenteve të dorëzuara me shkrim.
Më herët, BIRN shkruante se gjithe pikepyetjet mbi një listë të gjatë pasurish me origjinë të paqartë mbetën pa përgjigje të martën, në përballjen e kryetares së Gjykatës së Apelit të Vlorës, Alma Liçaj me Komisionin e Pavarur të Kualifikimit.
Gjyqtarja me karrierë 18-vjeçare zgjodhi t’u qëndronte përgjigjeve me shkrim dërguar Komisionit, pa sqaruar në seancën publike akuzat për deklarime të pasakta, mungesë burimesh financiare dhe fshehje të pasurisë, të ngritura si nga Inspektoriati i Lartë i Deklarimit dhe Kontrollit të Pasurive ashtu edhe nga Komisioni i Pavarur i Kualifikimit.
Procesi i vetingut për kryetaren e Gjykatës së Apelit të Vlorës përfshiu vetëm kriterin e pasurisë, ndërsa KPK hodhi poshtë një kërkesë të saj për vlerësimin e dy kritereve të tjera.
