Problemet e hasura me Albpetrol kanë detyruar qeverinë të shikojë mundësitë për të dhënë disa pika me koncesion, si një strategji shpëtimi për ndërmarrjen dhe garantimin e punës për punëtorët.
Rafineritë e ARMO-s vijojnë të kenë probleme të mëdha, pasi janë 1200 naftëtarë të cilët janë nxjerrë në rrugë dhe nuk kanë marrë pagat e tyre nga puna e kryer, pasi kompania përballet me probleme të shumta .
Pas ngërçit të krijuar, vetë kryeministri Rama zhvilloi një takim me naftëtarët, por ndërkohë iu bëri thirrje të pranojnë asistencat sociale deri në gjetjen e një zgjidhje përfundimtare për këtë çështje.
Mësohet se tre burime nafte të Albpetrol janë nxjerrë për dhënie me koncesion nga qeveria. Blloqet e dhëna janë: Cakran – Mollaj në Fier dhe Gorisht –Koçul dhe Amonicë në qarkun e Vlorës, janë nxjerrë për shitje nga ministria e Energjisë dhe më 31 mars përfundon dhënia e ofertave nga privatët.
“Burime nga ministria thonë se nëse procedura do të mbyllet me sukses, atëherë do të nisë dhe faza e parë e planit të ristrukturimit të Albpetrol. Qeveria ka lajmëruar se gradualisht kompania shtetërore e nxjerrjes së naftës do të kthehet në një njësi të vogël më pak veta për menaxhimin e kontratave hidrokarbure, ndërkohë organika me 2300 punëtorë do të shkurtohet ndjeshëm”-shkruan Tch.
Dy vend burimet e para Cakran-Mollaj dhe Gorisht-Koçul konisderohen me rezerva të kënaqshme naftë. Edhe më parë këto blloqe ka qenë dhënë me koncesion por qeveria i ka rimarrë puset për shkak të shkeljes së marrëveshjeve.
Autoritetet janë optimistë se gara do të japë rezultat pozitiv dhe brenda 6-mujorit të parë mund të nisin negociatat me kompanitë fituese.Paralelisht do të zbatohet dhe plani i ristrukturimit të personelit. Një pjesë e atyre që do të shkurtohen do të trajtohen me pagesa afatgjata, kurse një pjesë do të kalojnë tek kompanitë që do të marrin koncesionin.
