Mbledhja e përbashkët mes qeverisë së Shqipërisë dhe Maqedonisë së Veriut po mbahet në Shkup. Kryeministri Edi Rama është pritur me ceremoni zyrtare nga homologu i tij, Dimitar Kovaçevski. Janë rreth 20 marrëveshje dhe memorandume që prekin çështjen e integrimit të BE, krijimin e task-forcave të përbashkëta të sigurisë, implementimin e kontrollit të përbashkët kufitar në pikën e përbashkët të kalimit kufitar Qafë-Thanë. Gjithashtu janë përfshirë marrëveshje bashkëpunimi në fushën e ekonomisë, energjisë, arsimit dhe dixhitalizimit.
Në mbledhjen e përbashkët mes 2 qeverive, kryeministri Edi Rama tha se vendet e Ballkanit Perëndimor kanë shumë sfida, prandaj është më e mira që kjo të kalohet së bashku me njëri-tjetrin e jo vetëm.
“Lufta për të gjunjëzuar perëndimin, NATO dhe të gjitha vendet në perëndim të Rusisë, pjesë e të cilit jemi ne, lufta nuk ka ardhur me bomba e as me dëbime njerëzish, por me rritje çmimesh, dhe është gjithnjë e më e qartë që s’ka asnjë rrugë tjetër, përballimi me sfidat e kësaj kohe dhe vështirësitë e tejskajshme, që kjo kohë ka sjellë dhe adaptimit me një situatë ku ne jemi shumë të vegjël për të qëndruar me kurriz me njëri-tjetrin. Kemi shumë për të bërë me njëri-tjetrin”, tha Rama.
Kryeministri u shpreh se Bashkimi Europian duhet të përfshijë më shumë vendet e Ballkanit në “luftën” kundër rritjes së çmimeve apo edhe inflacionit. “Kjo mbledhje është edhe në aspektin e përpjekjeve tona të përbashkëta për t’u bërë pjesë e BE, sepse e kemi kapërcyer hendekun e madh dhe torturues mes të qenit gati për të hapur bisedimet dhe refuzimit të vazhdueshëm nga ana e BE-së. Sot të dyja vendet kanë celur procesin e negociatave dhe kanë hedhur një hap shumë para, në 6 dhjetor do të mbahet samiti i BE me Ballkanin Perëndimor dhe do jemi së bashku me të gjitha dëshirat, problemet dhe sfidat tona që janë gjithnjë e më të njëjta me ato të BE dhe është koha për të projektuar të ardhmen duke kërkuar së bashku nga BE që të na përfshijë gjithnjë e më shumë në përpjekjen e organizuar për t’i rezistuar rritjes së çmimit qoftë edhe inflacionit”, tha kryeministri Edi Rama.
Zëvendëskryeministri i Maqedonisë së Veriut, Artan Grubi, ka prezantuar në mbledhjen ndërqeveritare tre propozime projektesh për dy vendet.
Tre propozimet janë hapja e një pikë të re kufitare mes dy vendeve, lidhja e dy vendeve me hekurudhë Shkup-Durrës si dhe krijimi i një “Porti të Thatë” në Strugë që do t’i japë Maqedonisë së Veriut, “dalje në det.”
Ndërsa prezantonte propozimet, Grubi shpjegoi se për caktimin e vendkalimit të ri do të ngrihet një Komision i përbashkët ekspertësh, që do të përcaktojë vendodhjen dhe çdo aspekt tjetër deri te çështjet ligjore.
Pritet që pika e re kufitare të jetë diku pranë Qafë Thanës, me qëllim uljen e kostove të ndërtimit të autostradës që do të lidhë dy vendet.
Propozimi i dytë është krijimi i një lidhje hekurudhore mes dy vendeve, linja do të jetë Shkup-Durrës. Propozimi i tretë është ngritja e një “Porti të Thatë” në Strugë, që do t’i mundësojë Maqedonisë së Veriut “dalje” në portet shqiptare.
“Me anë të “Portit të Thatë” në Strugë që do të përdoret për ngarkesat që vijnë nga porti i Durrësit, në Porto Romano, duke siguruar qasjen e një vendi pa det në portin e Durrësit, vetëm në këtë mënyrë zhvillohen marrëdhëniet vëllazërore,” tha Grubi.
