Katër deputetët e LSI-së, të cilësuar si “tradhtarë” kanë bërë sot betimin në Kuvendin e Shqipërisë duke marrë mandatet, që u shoqëruan me duartrokitje nga deputetët socialistë.
Menjëherë pas marrjes së mandateve, deputetët e rinj kanë marrë detyrat e reja, duke u ndarë në komisionet parlamentare.
Deputeti Ylli Shehu do të jetë pjesë e Komisionit të Sigurisë; Enver Roshi caktohet anëtar në komisionin për Punën, Çështjet Sociale dhe Shëndetësinë dhe në komisionin për Edukimin dhe Mjetet e Informimit Publik; Aurora Mara do të jetë pjesë e komisionit për Integrimin Europian dhe në komisionin për Çështjet Ligjore, Administratën Publike dhe të Drejtat e Njeriut, kurse Edmond Rrushi caktohet anëtar në komisionin për Ekonominë dhe Financat dhe në komisionin për Sigurinë Kombëtare.
PROJEKTVENDIM “PËR DISA NDRYSHIME NË VENDIMIN NR. 90/2017
“PËR CAKTIMIN E ANËTARËSISË SË KOMISIONEVE TË PËRHERSHME TË KUVENDIT” TË NDRYSHUAR””
Në mbështetje të nenit 78, pika 1 të Kushtetutës, neneve 55, pika 1 dhe 21, pika 2 të Rregullores së Kuvendit, me propozimin e Konferencës së Kryetarëve,
KUVENDI I REPUBLIKËS SË SHQIPËRISË VENDOSI:
Në vendimin e Kuvendit nr. 90/2017 “Për caktimin e anëtarësisë së komisioneve të përhershme të Kuvendit” bëhen këto ndryshime:
- Deputeti Ylli Shehu caktohet anëtar në komisionin për Sigurinë Kombëtare dhe në komisionin për Veprimtaritë Prodhuese, Tregtinë dhe Mjedisin.
- Deputeti Enver Roshi caktohet anëtar në komisionin për Punën, Çështjet Sociale dhe Shëndetësinë dhe në komisionin për Edukimin dhe Mjetet e Informimit Publik.
III. Deputetja Aurora Mara caktohet anëtare në komisionin për Integrimin Europian dhe në komisionin për Çështjet Ligjore, Administratën Publike dhe të Drejtat e Njeriut.
- Deputeti Edmond Rrushi caktohet anëtar në komisionin për Ekonominë dhe Financat dhe në komisionin për Sigurinë Kombëtare.
- Ky vendim hyn në fuqi menjëherë.
Miratuar datë 05.03.2019
