Para dy ditësh, akademiku Fuga u bëri ftesë të hapur të gjithë gazetarëve që të jenë të pranishëm sot në Akademinë e Shkencave, për të raportuar atë që pedagogu e quan “farsë zgjedhore.”
Fuga kërkoi ndalimin e katrahurës së zgjedhjeve të sotme, ku sipas tij, nënkryetari do të bëhet kryetar dhe kryetari do të bëhet nënkryetar.
Madje, Fuga i shkroi një letër publike kryeministrit Rama, ku i rrëfente të gjitha pakënaqësitë lidhur me atë që po ndodh me Akademinë e Shkencave.
Para pak minutash ka reaguar ashpër vetë kryeministri me anë të një postimi në Facebook.
Rama kërkon reformimin e Akademisë së Shkencave, përndryshe e bën të qartë se ajo nuk do të marrë asnjë qindarkë nga buxheti, madje do t’i duhet të dorëzojë godinën.
“Nëse nuk reformohet Akademia e Shkencave nuk do marrë më asnjë qindarkë nga buxheti e do të duhet të dorëzojë godinën! Prandaj #StopFarsës”, shkruan kryeministri në përgjigje të letrës publike të akademikut Fuga.
