Pas kërkesës së Prokurorisë së Përgjithshme për arrestimin e Saimir Tahirit, një tjetër kërkesë është nisur për arrestimin e drejtuesve të lartë të policisë së shtetit, të cilët mendohen të jenë përfshirë në trafikun e drogës midis Shqipërisë dhe Italisë, ku një ndër emrat përflitet ai i kreut të Policisë së Shtetit Haki Çako.
Sipas burimeve kofidendenciale për Tirana Today. Këta bëjnë pjesë në dosjen me 30 emra të dërguara nga Italia një ditë më parë ku janë të pëfshirë drejtues të lartë të policisë së shtetit, duke iu krijuar akses vëllezërve Habilaj në trafikun e drogës për në Itali.
Dosja me 30 emrat e punonjësve të policisë
Prokuroria italiane i dërgon prokurorisë tonë listën me 30 punonjës të policisë shqiptare që janë të implikuar në trafikun e drogës që drejtonin grupi i Habilajve. Sipas burimeve për Tirana Today në hetim janë drejtues dhe efektive të policisë shqiptare që kanë mbështetur dhe favorizuar grupin e Habilajve për trafikun e drogës, në mes tyre është dhe ish-ministri i Brendshëm Saimir Tahiri. Po ashtu nën hetim janë dhe familjarët e Habilajve në Vlorë që kanë mbështetur dhe favorizuar grupin e Habilajve për trafikun e drogës
Ka të dhëna të mjaftueshme se 30 personat që janë nën hetim kanë bashkëpunuar me grupin kriminal te Habilajve në trafikun e drogës, apo që kanë favorizuar këtë grup. Mësohet se këta emra janë evidentuar nga autoritetet italiane të hetimit dhe i janë përcjellë palës shqiptare. Burimet saktësojnë se mes këtyre emrave ka drejtues të larte në policinë e Vlorës, atë të Fierit, të Delta Force dhe të policisë kufitare në Portin e Vlorës. Bëhet fjalë për persona që kanë drejtuar në këto sektorë që nga viti 2013 dhe deri pak dite më parë kur autoritetet italiane mbyllën hetimet paraprake për grupin e drejtuar nga Moisi Habilaj dhe kryen arrestimet.
