Partitë opozitare në Maqedoninë e Veriut kërkojnë dorëheqjen e kryeministrit Zoran Zaev, si dhe mbajtjen e zgjedhjeve të parakohshme parlamentare. Kjo kërkesë erdhi pas dështimit për hapjen e negociatave.
Në një deklaratë për mediat, kreu i VMRO-DPMNE-së, Hristijan Mickovski nuk fajësoi Francën dhe popullin maqedonas, por qeverinë.
“Vendimi për mos marrjen e datës është dështim, por jo dështim i popullit maqedonas dhe qytetarëve të Maqedonisë. Është dështim i politikave të Zoran Zaevit dhe këtij pushtetit. Është politika, pa koncept, pa vizion me shumë krim, korrupsion, haram, mos punimi dhe mashtrim. Dhe patjetër të jemi vetëkritik dhe të pranohet se nuk ka datë për fillim të negociatave sepse nuk ka reforma, sepse populli jeton me vështirësi dhe nuk ka shtet tjetër ku krimi sundon me sistemin”, deklaroi Hristijan Mickovski.
Nga ana tjetër, kryetari i Aleancës për shqiptarët, Ziadin Sela u shpreh se përveç LSDM-së dhe kryeministrit Zoran Zaev, përgjegjësi për mos marrjen e datës kanë edhe partnerët e koalicionit qeveritar.
“Ata zgjodhën krimin dhe korrupsionin në vend se të zgjedhin progresin, të drejtën dhe BE-në. Ata zgjodhën Bashkimin Demokratik për Integrim dhe kriminelët e mëdhenj e të vegjël të tyre në vend që të zgjedhin progresin dhe ardhmërinë e rinisë. Arsyetimi i kryeministrit dikur që nuk duhet të shkojmë në zgjedhje të parakohshme sepse presim datë për bisedime u tregua sot që ka qenë i gabuar sepse sa më gjatë që ta kesh BDI-në brenda në Qeveri, veç se mund të bëhesh si ata dhe nuk mund që të reformosh sistemin e drejtësisë”, tha Ziadin Sela, Aleanca për Shqiptarët, shkruan Alsat.
Lidhur me përgjigjen negative për hapjen e negociatave ka reaguar edhe kreu i Lëvizjes BESA, Bilall Kasami. “Nëse ata nuk kanë guxim që të japin dorëheqje dhe të shkojnë në zgjedhje të parakohshme, sigurisht që Lëvizja BESA do të shfrytëzojë të gjitha mekanizmat institucional dhe të gjitha mekanizmat e një demokracie evropiane, siç pretendojmë të jemi, duke shfrytëzuar edhe mekanizmin e protestës që të bëjmë presion për zgjedhjet e parakohshme.”
