Një sasi e konsiderueshme në paundësh britanikë janë sekuestruar mbrëmjen e sotme në portin e Durrësit. Sipas informacioneve paraprake, paratë ishin të fshehura në një furgon që vinte nga Italia, dhe u zbuluan nga kontrolli në vijën e dytë.
Furgoni ku ndodheshin paratë kishte ardhur me tragetin e sotëm. Sasia e saktë e parave të sekuestruara nuk dihet ende, teksa vijon numërimi i tyre. Ndërkohë, drejtuesi i furgonit ku ndodheshin paratë është shoqëruar në komisariat.
Ky është rasti i dytë i regjistruar ditën e sotme në portin e Durrësit. Gjatë orëve të pasdites, brenda një kamioni që vinte nga Maqedonia e Veriut, u gjet një sasi prej 300 kg kokaine, e cila dyshohet se destinacionin përfundimtar kishte qytetin italian të Napolit.
Kamioni është nisur fillimisht nga Belgjika, për të mbërritur në Serbi dhe më pas në Maqedoninë e Veriut.
Droga ishte vendosur në trup të kamionit, ndërsa ishte fshehur brenda pakove që mbanin logo të gjashtë markave të ndryshme nga “Chikago Bulls”, e deri te ekipi parisien “Paris Saint Germain”.
