Partizani i Gegës është superior ndaj të gjithë ekipeve të Superiores. Kukësi ishte viktima e radhës së “Të Kuqve”, të cilët i mposhti në “Elbasan Arena”. Ka mjaftuar goli i Esat Malës në këtë sfidë të vështirë për “Demat” për të siguruar fitoren dhe vendin e parë.
Ishte një kundërsulm perfekt i kryeqytetasve, me Bardhin që dha asistin e zgjuar për Malën, i cili kaloi topin mbi portierin Frashëri, duke e dërguar në rrjetë. Kukësi ka pasur një rast të artë për të shënuar me Rexhinaldon, por ky i fundit nuk e shënjestron dot portën e mbrojtur nga Hoxha. Pjesa e parë ishte shumë e luftuar dhe e ashpër nga të dy skuadrat.
Në pjesën e dytë, Kukësi i afrohet golit të paktën dy herë, me Kalanë dhe me Shafik, por në të dy rastet, futbollistët e verilindorëve nuk gjetën shënjestrën e duhur. Hoxha u ngjit në katedër kur i tha jo goditjes me kokë të Shpehar, duke fluturuar dhe duke devijuar në goditje nga këndi.
Në anën tjetër, Frashëri bëri të njëjtën gjë duke mohuar golin e dytë. Pas katër minutash shtesë, erdhi vërshëllima e arbitrit që mbylli këtë supersfidë. Për Partizanin është fitorja e gjashtë në këtë kampionat dhe e pesta radhazi. Që pas barazimit ndaj Laçit, skuadra e Gegës ka marrë katër fitore radhazi.
Kukësi: Frashëri, Maliki, Shameti, Cuculi, Uilliam, Ethemi, Dzaria (Limaj 46′), Shkodra, Shafik (Shpehar 71′), Kalaja (Çyrbja 60′), Rexhinaldo. Trajner: Armando Cungu. Të gatshëm: Maloku, Krasniqi, Qaqi, Zguro.
Partizani: Hoxha, Ibrahimi, Belica, Atanda, Trashi, Telushi, Hila, Asani, Bardhi (Hebaj 70′), Mala (Çinari 74′), Mensah (Kote 58′). Trajner: Skënder Gega. Të gatshëm: Xhika, Gojkoviç, Kalari, So Hyon.
