Partizani është rikthyer tek fitorja dhe e bën në mënyrë mjaft spektakolare, duke përmbysur kampionët në fuqi të Kukësit në “Zeqir Ymeri”. Padyshim ka qenë Bardhi njeriu i ndeshjes i cili fillimisht ka gjetur golin e barazimit dhe më pas ka asistuar për Prognin që vulosi përmbysjen. Kjo ishte fitorja e parë e Starovës për këtë sezon në krye të partizanit, të cilën e arriti duke e parë ndeshjen nga dhomat e zhveshjes, pasi u përjashtua nga gjyqtari pas protestave të shumta. Ndërsa sa i përket Kukësit, kjo humbje djeg shumë, pasi kishte shansin të shkurtonte diferencën me Skënderbeun e vendit të parë dhe nuk e bën dot. Por jo vetëm kaq, kjo humbje do të sjellë edhe “lëkundje” në pozicionin e trajnerit Milinkoviç i cili është kritikuar disa herë nga presidenti Gjici.
Ndeshja nis në mënyrën më të mirë për vendasit, pasi fitojnë një 11-metërsh që në minutën e 8’ dhe Guri e dërgon topin në rrjetë duke i dhënë avantazhin vendasve. Në këtë moment vjen edhe kartoni i kuq për Starovën i cili e konteston shumë vendimin e arbitrit për këtë penallti. Por nuk zgjat shumë dhe pas një krosimi në zonën e verilindorëve, krijohet një rrëmujë në zonë dhe është Bardhi që shtynë topin në rrjetë për të barazuar rezultatin. Ndërsa ë minutat e fundit të së parës, mbrojtësi i Kukësit Albi Alla bën një gabim amator dhe aty përfiton bardhi i cili ia servir mjaft mirë topin Prognit dhe ky i fundit e dërgon me mjaft lehtësi në rrjetë. Pjesa e dytë fillon dhe mbaron me një Kukës ofansiv, i cili sulmon në të gjitha mënyrat por e ka mjaft të vështirë të gjejë rrugën e rrjetës, pasi edhe potjeri Hoxha është në një formë mjaft të mirë dhe bën disa pritje deçizive. Ishte sërish Guri që iu afrua shumë golit, por shtylla nuk e lejoi të festonte. Me rezultatin 1-2 të vendosur që në pjesën e parë mbyllet edhe sfida e cila bën kthesën tek Partizani dhe dëmton Kukësin që ka objektiv kampionatin.
