Pasi u eliminua nga Europa League Partizani ka marrë pushimet, të cilat do të zgjasin deri në fund të korrikut. Gjatë kësaj periudhe pushimi, drejtuesit e lartë pritet që të formatojnë strukturat e reja të klubit, ku një proces i vështirë shikohet edhe gjetja e pasuesit të Sulejman Starovës.
Trajneri i sezonit të fundit të Luftëtarit, Mladen Milinkoviç, shikohet si më i preferuari për dashamirësit e kuq dhe mendohet se edhe klubi po punon në këtë drejtim. Trajneri serb e ka pranuar vetë kohë më parë për se Partizani nuk mund të refuzohet. Milinkoviç gëzon edhe respektin e presidentit Gaz Demi, megjithatë trajneri i ri i “demave” mbetet kompetencë e Luçiano Moxhit, i cili është arkitekti i skuadrës së sezonit të ri.
Gjatë ditëve të fundit, Moxhi ka pasur një takim me menaxherin e trajnerit serb, Paskal Papadopulos, i cili është edhe themeluesi i agjencisë “PPA World”. Bisedimet nuk kanë pasur lidhje vetëm me mundësinë e afrimit të trajnerit Mladen Milinkoviç, por edhe në zgjerimin e bashkëpunimit me agjencinë e Papadopulosit, i cili ka në menaxhim disa futbollistë të ndryshëm.
