Partizani nuk dorëzohet edhe këtë herë, mposht Tiranën në “Selman Stërmasi” dhe merr kryesimin e kampionatit. Një derbi i ‘zjarrtë’ që u vendos që në pjesën e parë falë golit të shënuar nga Esat Mala. Ndërsa në kampin bardheblu vazhdon kriza dhe nuk dihet se çfarë vendimesh do të merren pas kësaj humbje. Ishin pikërisht të kuqtë e udhëhequr nga trajneri Skënder Gega ata që dominuan duelin, për të marrë edhe maksimumin prej tij, tre pikë shumë të rëndësishme.
Super atmosferë në “Selman Stërmasi” për derbin e kryeqytetit, me një stadium thuajse tërësisht të ezauruar, me përjashtim të tribunave anësore që janë jashtë funksioni. Homazhe për të ndjerin tifoz të Partizanit, Leo, që u nda nga jeta vetëm një ditë më parë. Mbase jo vetëm për shkak të formës sportive dhe situatës pozitive që po përjeton këtë fillim sezoni, por edhe të motivuar nga kjo atmosferë, Partizani ka dominuar dhe ka dalë i fituar nga derbi.
Në fakt ishin bardheblutë ata që dhanë sinjalin e parë në duel, me Edon Hasanin që në minutën e 12’ ka shpërdoruar shansin më të mirë për të kaluar Tiranën në avantazh, por i vetëm përballë Hoxhës, ka dërguar topin jashtë kuadratit. Vetëm 9’ minuta më pas, Partizani ka bërë krejt të kundërtën, me Mala që ka fituar duelin me mbrojtësinë dhe dërgon topin në rrjetë për të kaluar të kuqtë në avantazh.
Tirana-Partizani 0-1
Shënues: Mala 21’
Tirana: Lika, Hoxhallari, Berisha, Turtulli, Maveje, Daja, Hasani, Kobinah, Sentamu, Blazhevski.
Trajner: Ze Maria
Partizani: Hoxha, Ibrahimi, Belica, Atanda, Trashi, Telushi, Hila, Mala, Asani, Mensah, Bardhi.
Trajneri: Skënder Gega
