Komiteti për Çështje Ligjore i Parlamentit Evropian vendosi përfundimisht që dy kandidatë për komisionerë të Bashkimit Evropian nuk janë të përshtatshëm për pozitat. Komiteti për çështje ligjore ka gjetur konflikt interesi për kandidatin hungarez, Laszlo Trocsanyi, dhe kandidaten rumune, Rovana Plumb.
Komiteti u mblodh të premten kur edhe janë konstatuar konfliktet e interesit, por për shkak të mungesës së praktikës në lidhje me këtë çështje, kryetari i Parlamentit Evropian, David Sassoli, kërkoi që Komiteti ta shqyrtojë sërish situatën të hënën.
Kandidatja Rovana Plumb nuk ka njoftuar për dy kredi private në vlerë prej gati një milion eurosh, ndërsa kandidati Laszlo Trocsanyi nuk ka arritur të sqarojë lidhjet midis firmës së tij juridike dhe punës që ka bërë për Qeverinë hungareze. Ndërkohë, disa anëtarë të Komitetit kanë identifikuar edhe lidhjet e Troscanyit me Qeverinë ruse.
Rovana Plumb ka qenë kandidate për komisionare të Transportit të BE-së, ndërsa Laszlo Trocsanyi për komisionar për Zgjerim. Meqë gjetjet e Komitetit për Çështje Ligjore të Parlamentit Evropian janë përfundimtare, kryetari i Parlamentit, Sassoli, duhet t’i dërgojë tani letër presidentes së zgjedhur të Komisionit Evropian, Ursula von der Leyen, për të pyetur për hapat e saj të ardhshëm.
Edhe pse Komiteti rekomandon që këta dy emra të zëvendësohen me propozime të reja nga Bukureshti dhe Budapesti, Von der Leyen ka lirinë të vendosë se çfarë të bëjë me kandidatët e saj. Seancat dëgjimore të konfirmimit të tyre, të parapara për në fillim të tetorit, janë shtyrë deri në vendimin e ri të Von der Leyen.
