Parlamenti Evropian miratoi mbrëmë amendamentin e Grupit të Partive Popullore Europiane me tekst: “Parlamenti Evropian thekson 15 kushtet e caktuara nga Këshilli i Bashkimit Evropian, që Shqipëria duhet të ketë përmbushur përpara thirrjes Konferencës së parë Ndërqeveritare, me shtetet anëtare”.
Me 388 vota pro, 280 vota kundër dhe 19 abstenime, amendamenti i firmosur nga eurodeputetja Kinga Gàl me kërkesën e raporterit Lega dhe me mbështetjen e koordinatorit Gahler, erdhi si përgjigje e mohimit të përsëritur nga kryeministri Rama javën e shkuar të ekzistencës së 15 kushteve.
Në fillim, kryeministri u bishtnoi, ndërsa edhe dje duket se i ironizoi, kur tha se nuk janë 15, po mijëra kushte që do kemi rrugës. Këto kushte u vendosën nga Këshilli Evropian (shtetet anëtare) me propozimin e Gjermanisë, Francës, Holandës, Danimarkës e Spanjës në mars të këtij viti. Pro amendamentit votuan Grupi Liberal dhe ai Konservator si dhe shumë deputetë nga e majta dhe djathta pavarësisht qëndrimit formal të grupeve.
Grupi Social Demokrat formalisht nuk u shpreh pro-amendimit me shpjegimin se nuk duhej zbehur jehona festive e samitit të Zagrebit. Por shumë eurodeputetë socialdemokratë të prirë nga danezët dhe finlandezët, votuan pro PPE, siç e tregon edhe rezultati. Një pjesë e nxitur nga eurodeputetët rumunë votuan kundra.
