Prej disa ditësh mediat kanë shkruar në lidhje me përfshirjen e Partisë Demokratike për lobimin në SHBA. Duke iu referuar revistës amerikanë “Mother Jones”, e cila shkruante se fushata e lobimit të Luzim Bashës është paguar nga biznesmenë rusë, kjo situatë është përdorur nga politika për të hedhur akuza ndaj selisë blu.
Ky shkrim është përgënjeshtruar nga Partia Demokratike duke e quajtur si të pavërtetë dhe me insinuata që ka prapavijë politike. Gjithashtu Basha ka sqaruar se ekspertët ligjorë të PD-së, po shqyrtojnë mundësinë për ta hedhur në gjyq revistën amerikanë për prishje të imazhit.
Ndërkohë kreu i Unionit të Gazetarëve të Shqipërisë, Aleksandër Çipa teksa ka folur për çështjen e lobimit, u shpreh se mungon gjerësisht transparenca. Sipas tij, lobet po iu marrin paratë shqiptarëve .
Ai shkoi më tej ku theksoi se pas kësaj, problemi vështirësohet edhe me tej kur paratë kanalizohen në një drejtim të rrezikshëm. Sipas tij, partitë duhet të tregohen vigjilente dhe te deklarojnë transparencë sa i takon aspektit financiar.
“Problemi që ka opinioni publik shqiptar është me transparencën financiare të partive. Këtu nuk bëhet falë për njërën apo tjetrën parti, por është një problem i madh në tërësi. Paratë ikin nga Shqipëria dhe kjo është një diçka jo e mirë. Kjo dihet, por problemi kryesor është fakti i kanaleve se si lëvizin këto para”-tha Çipa në Report Tv.
