Presidenti i Kosovës është pritur sot nga Ati i Shenjtë, Papa Françesku, në Selinë e Shenjtë në Vatikan.
Sipas njoftimit të zyrës së Presidentit, Thaçi ka theksuar se Kosova vazhdon të ruajë durimin, besimin, vlerat, dashurinë dhe solidaritetin në familje, ndërsa Vatikani është udhërrëfyes për promovimin e këtyre vlerave.
“Vatikani është udhërrëfyes dhe motivues për të qëndruar të paluhatur në mbrojtjen dhe promovimin e këtyre vlerave. Prandaj, edhe jemi krenarë me Nenën Terezë, sepse askush më mirë se ajo nuk i ka mbrojtur dhe përhapur kudo në botë këto vlera”, mësohet të jetë shprehur Thaçi në takimin me Atin e Shenjtë.
Gjithashtu, presidenti i Kosovës e informoi Atin e Shenjtë për konsolidimin e shtetit të Kosovës, për bashkëjetesën ndërmjet komuniteteve dhe feve të ndryshme:
“Kosova është shembull i dialogut ndërmjet komuniteteve dhe bashkëjetesës fetare. Jemi të lumtur që në fillim të muajit është shuguruar Katedralja e Nënë Terezës në Kosovë. Ju faleminderit që keni dërguar të çmuarin Kardinalin Ernest Simonin”.
Ndër të tjera, Thaçi tha se po zhvillojmë dialogun me Serbinë, në ndërtimin e marrëdhënieve të mira fqinjësore, normalizim të marrëdhënieve dhe njohje reciproke.
Në fund, presidenti Thaçi ia përcolli Atit të Shenjtë edhe një herë ftesën e përzemërt, në emër të të gjithë qytetarëve, që të vizitojë Kosovën.
