Shqipëria vijon të jetë peng i korrupsionit dhe deformimit të së drejtës së pronës, duke mbajtur larg investimet e huaja. Ky është konstatimi që bën raporti i Institutit Frazer botuar për llogari të Forumit Ekonomik Global. Në shumicën e problemeve që pengojnë investimet e huaja dhe iniciativën për të bërë biznes janë taksat e larta, korrupsioni, burokracia qeveritare, forca e pakualifikuar e punës, inflacioni, etika e dobët e forcës punëtore, politikat e paqëndrueshme, infrastruktura e dobët, krimi dhe vjedhjet, mungesa e kapacitetit inovator etj.
Pavarësisht se Shqipëria cilësohet si një nga vendet me lirinë më të madhe për të investuar, e gjitha kjo vjen për shkak të tregut informal. Por ky treg bart një sërë problematikash duke nisur që nga korrupsioni, burokracia, taksat dhe infrastruktura tejet e dobët. Vendi ka fituar edhe 10 pozicione të tjera në indeksin global të lirisë ekonomike për vitin 2017, por treguesit e nxitjes së investimeve të huaja janë tërësisht negative. Për këtë arsye, Shqipëria renditet e 120-ta në botë sa i përket rregullatorëve të tregut që mundësojnë investimet e huaja. Kjo vjen për shkak sepse sistemi ligjor dhe çështjet me të drejtën e pronës vazhdojnë të jenë një pengesë për investitorët e huaj.
Edhe nën-indikatori që i referohet sistemit ligjor dhe të drejtës së pronës shënon një performancë negative, së bashku me atë të rregullatorëve. Në nivel global ndërkohë, në vend të parë vijon të jetë Hong-Kongu. Indeksi merr në shqyrtim disa kategori, si: Madhësia e Qeverisë, Struktura Ligjore ku përfshihet edhe mbrojtja e së drejtës mbi pronën, paratë e pastra, lehtësia e tregtisë ndërkombëtare dhe legjislacioni./Tirana Today
Raporti i Forumit Ekonomik Botëror- Liria Ekonomike dhe faktorët që pengojnë investimet e huaja by Tirana Today on Scribd
