Ministrja e Shëndetësisë, Ogerta Manatirliu, vizitoi sot laboratorin e referencës në Institutin e Shëndetit Publik, ku bëri me dije se testimet për linë e majmunit do të kryhen në Shqipëri. Ajo pohoi se për 250 rastet të para që mund të jenë të dyshuara, të jenë në dispozicion testet specifike në këtë laborator. Më konkretisht, në këtë laborator të testohen rastet e dyshuara dhe gjithashtu kontaktet e dyshuara të rasteve.
“Në laboratorin e referencës në Institutin e Shëndetit Publik, tashmë ne kemi bërë të mundur që për 250 rastet të para që mund të jenë të dyshuara, të kemi dhe testet specifike në këtë laborator. Pra, do të kemi mundësi që pikërisht në këtë laborator, pa i çuar në laboratorët e referencës, të mundet të testojmë raste të dyshuara dhe gjithashtu kontaktet e dyshuara të rasteve”, bëri me dije Manastirliu, duke shtuar se bashkëpunimi me laboratorët e referencës do të vijojë.
Sakaq, Drejtoresha e Institutit të Shëndetit Publik, Dr. Eugena Tomini, duke folur për monitorimin e situatës për linë e majmunit tha: “Aktualisht kemi sërish një survejancë e angazhuar siç është ajo e lisë së majmunit, duke shtuar kapacitetet diagnostike në Institutin e Shëndetit Publik, dhe për më tepër diagnoza kryhet në vend, pavarësisht se ne kemi vazhdimisht komunikim me networkun e laboratorëve të referencës në Europë, për të konfirmuar diagnozën”.
Sipas Qendrës Europiane për Kontrollin e Sëmundjeve, Shqipëria vlerësohet me risk të ulët përsa i përket lisë së majmunit. Vendet Europiane tashmë janë në alert, sepse janë më shumë se 29 vende ku janë konstatuar më shumë se 1700 raste të lisë së majmunit.
