Shtabi i Krizave për komunat në Veri të Kosovës ka vendosur të rikthejë ndalimin e lëvizjes nga ora 21:00 deri në 5 të mëngjesit.
Gjatë një konference të jashtëzakonshme për shtyp, zv.kryeministri i Kosovës, Goran Rakiç, tha se aplikimi i kësaj mase do të nisë nga dita e sotme.
Rakiç theksoi se masat e reja erdhën për shkak të situatës së përkeqësuar epidemiologjike dhe numrit të shtuar të rasteve të infeksionit koronavirus.
“Nga sot, deri në javën tjetër, nga 9 pasdite deri në 5 të mëngjesit, lëvizja e të gjithë personave është e ndaluar, përveç atyre personave që janë përgjegjës për luftimin e pandemisë dhe ruajtjen e rendit dhe qetësisë publike”, thuhet në vendimin e Shtabit të Krizave, deklaroi Rakić.
Ndërkohë do të ndalohet hyrja dhe largimi nga territori i katër komunave në Veri, përveç personave me leje speciale. Gjithashtu, institucionet publike në veri të Kosovës do të zvogëlojnë numrin e punëtorëve në minimum.
