Ndonëse u duk sikur pandemia pati frenim dhe kjo ndikoi edhe në lirimin e masave shtrënguese, tashmë situata ka marrë një tjetër rrjedhë. Një epidemiolog i lartë në Francë ka dhënë alarmin, se me këto shifra të të prekurve, vendi do të gjunjëzohet nga koronavirusi.
Paralajmërimi vjen në një kohë kur Franca raportoi 7071 raste të reja të dielën në mbrëmje, pas një rritje me rreth 8500 raste të shtunën dhe pothuajse 9000 raste të reja të premten.
Epidemiologu Antoine Fontanet ka paralajmëruar se nëse numri i rasteve me Covid-19 vazhdon të rritet me ritmin aktual, vendi mund të përballet me një situatë kritike.
Situata kritike, sipas tij, mund të pasojë në disa rajone në muajin dhjetor. Ai tha se autoritetet duhet të veprojnë tani, për të shmangur rregulloret e rrepta më vonë.
“Sot ne kemi një rritje të numrit të rasteve të reja në javë me 30%, dhe një rritje 15% të numrit të pranimeve javore në spitale. Nëse vazhdon ky ritëm, ne do të arrijmë një situatë kritike në disa rajone të Francës në dhjetor. Do ishte më mirë të veprohet tani, sa më herët të veprojmë aq më pak të rrepta do të jenë masat…”.
