Shumë afër kryeqytetit ndodhet tregu i Kamzës, i cili është një prej tregjeve më problematike sa i takon sigurisë ushqimore. Tregtarë të ndryshëm dalin çdo ditë për të shitur fruta, perime apo produkte të tjera si qumështi e nënproduktet e tij. Edhe pse është e ndaluar të shesësh në shishe plastike, ato shihen masivisht në çdo cep të rrugës. Tregtarët thonë për Tirana Today se nuk i përdorin bidonët plastikë më shumë se dy herë, por deformimi i tyre tregon se konsumohen më shpesh. Duke rrezikuar në këtë mënyrë jetën e konsumatorëve.
TT- Ku i gjen këto shishet?
Shitësja 1 –Mi japin gratë që marrin qumështin.
TT –I riciklon?
Shitësja 1 –Po.
TT –Sa fitim ke?
Shitësja 1 –Për Zotin, atë muhabet jam duke bërë. Mundimi është shumë i madh dhe është shumë lirë.
TT –Kur të mbetet qumështi, ku e çon?
Shitësja 1 –E çoj në shtëpi, e më pas e bëj gjizë e djathë.
TT –Gjalpë është ky?
Shitësja 2 –Po, gjalpë.
TT –Sa e shet?
Shitësja 2 –Ta peshoj, se është me peshë.
TT –Nuk është e rrezikshme që ti e mban këtu jashtë dhe jo në frigorifer?
Shitësja 2 –Prej frigoriferit e kam marr.
TT –Për sa e mban këtu, sa orë qëndron?
Shitësja 2 –Dy orë e iki.
TT –Reziston gjalpi për dy orë?
Shitësja 2-Po, është mall i freskët.
TT –Qumësht shet?
Shitësja 2-Po.
TT –Shishet ku i gjeni?
Shitësja 2-I blej me një lokal 100 lekë copa. Asnjëherë nuk e përdor bidonin 2 herë.
Një tregtar thotë për Tirana Today se ka raste kur shitës të ndryshëm blejnë shishe nga persona të cilët i mbledhin në koshat e plehrave.
“Dhe mund të ketë, si i thonë një fjale që ‘pyll pa derra, nuk ka’. Mua këto mi ka sjellë vetë klienti sot. Por, unë gjithmonë i blej në dyqan, sepse e di që janë shumë të rrezikshme të përdorësh më shumë se dy herë një shishe plastike. Nuk përdorim ato të qelqit, pasi janë më të shtrenjta dhe nuk gjendet lehtë.
Edhe të shesësh qumështin në rrugë, e di shumë mirë që nuk është e sigurt. Por, nuk kemi çfarë të bëjmë. Këtu ne nuk kemi një treg ku të dalim, e të shesim. As neve nuk na pëlqen të dalim çdo ditë me çantën në kurriz e të qëndrojmë me frikë, teksa mundohemi të nxjerrim bukën e gojës.”
Teksa për një tjetër qytetarë, më e rrezikshme është të blesh qumësht apo nënprodukte nëpër dyqane. Kjo pasi nuk të ofrojnë asnjë siguri, madje shpesh herë janë të skaduar.
“Unë e tregtoj vetë qumështin, më mirë të pi atë që kam në shtëpinë time, sesa të pi nëpër supermarkete. Ky është qumështi më i mirë dhe më i pastër.”
Edhe pse duket si një situatë normale, banorët thonë se nuk ndjehen aspak të sigurt me ushqimet që konsumojnë. Sipas tyre kjo gjendje vazhdon të jetë e njëjtë prej vitesh, por përsëri asnjë inspektor i AKU nuk kanë shkuar asnjëherë për të ndaluar këta tregtarë të sheshin në rrugë.
“Inspektorët e AKU-së janë me recetë, të adresuar nga persona që, shko atje e blloko. Por, ky është turp, pasi është një korrupsion total. Unë asnjëherë nuk kam blerë produkte të bulmetit të cilat shiten në rrugë, pasi janë të dëmshme, nuk mund t’i hash.”
“Ne nuk jemi aspak të sigurt me ushqimet që konsumojmë. Madje rrezikojmë shumë për shëndetin tonë. Pavarësisht se kushtet janë skandaloze, janë të pakët ata njerëz të cilët i blejnë në dyqane, pasi shumica i blejnë këtu në treg. Dhe duke parë se çfarë konsumojnë janë shumë të fortë.
Gjithmonë kjo situatë ka qenë, madje dita-ditës bëhet edhe më keq. Unë nuk kam parë asnjëherë inspektorë të AKU-së. Sepse nëse do të kishin ardhur, nuk do ishte kjo situatë. As AKU e as Bashkia nuk kanë menduar për të zgjidhur këtë situatë.” TIRANA TODAY
