Kryeministri Edi Rama ka reaguar sot, 20 nëntor, me një mesazh në rrjetet sociale me rastin e Ditës Ndërkombëtare të të Drejtave të Fëmijëve, duke theksuar se lumturia e tyre është një e drejtë themelore që shoqëria duhet ta garantojë.
“Lumturia është një e drejtë themelore. Detyra jonë është ta mbështesim, ta mbrojmë dhe ta nxisim çdo ditë”, shkruan Rama, duke shtuar se janë vetë fëmijët ata që e kujtojnë më bukur këtë të drejtë.
20 nëntori shënon Ditën Ndërkombëtare të të Drejtave të Fëmijëve, e shpallur nga OKB në nder të Konventës për të Drejtat e Fëmijës të miratuar në vitin 1989. Shqipëria e ratifikoi këtë konventë në vitin 1992 dhe prej atëherë është zotuar të garantojë mbrojtjen, arsimin, shëndetin dhe mirëqenien e fëmijëve.
Rama apelon që kjo ditë të mos mbetet vetëm simbolike, por të shërbejë si kujtesë se mbrojtja e fëmijëve është përgjegjësi e përditshme.
