Paraditen e sotme, deputeti demokrat Edi Paloka ka vizituar banorët e Astirit. Në një pronocim për median, Paloka tha se gjatë natës, disa ordinerë, siç i cilësoi ai, kërcënojnë banorët. Ai deklaroi se gjatë natës, kriminelët me xhama të zinj kërcënojnë banorët, dhe se pas kësaj fshihet Rama. Për të, kryeministri është gati të bëjë gjithçka.
“Natën vijnë kriminelë, ordinerë me xhama të zinj dhe kërcënojnë banorët. Më siguri do marrin leje për ndonjë pallat. Edi Rama është gati të bëjë gjithçka. Këta banorë kanë të drejtën të rrinë në shtëpinë e tyre. Në asnjë mënyrë nuk ka Edi Rama të drejtë t’i nxjerrë ata nga shtëpia. As me këto forma që marrin dikë dhe e joshin për ta nxjerrë në televizor dhe thonë; ja këta pranuan”, tha Paloka.
I pyetur nëse do të ketë protesta masive nga opozita, deputeti u shpreh se do të jenë në mbështetje të qytetarëve.
“Unë kam bërë një thirrje timen, duke e parë që qytetarët që cilët dhunohen janë të shumtë nuk janë vetëm banorët e Astirit. Absolutisht duhet të bashkohen të gjithë. Ka vetëm një zgjidhje, dhe zgjidhja është një. Problemi është Edi Rama dhe zgjidhja është largimi i Edi Ramës nga ajo karrige”, përfundoi Paloka.
