Dy nënkryetarët e PD-së, Edi Paloka dhe Edmond Spaho, pas delegimit të vendimmarrjes organizative për zgjedhjet e reja në parti, njoftojnë me anë të një deklarate publike, se zgjedhjet për kreun e ri të PD-së janë të hapura dhe se të drejtën për të kandiduar e ka çdo anëtar i kësaj force politike.
Gara për drejtuesin e ri të demokratëve vlerësohet nga dy nënkryetarët si një mundësi shumë e mirë për reflektim, diskutim idesh dhe konkurrencë vizionesh për të ardhmen e partisë dhe demokracisë në vend.
“Mendimi ndryshe, debati dhe përplasja e ideve, janë vlera themelore të Partisë Demokratike, por diskutimet duhen zhvilluar në mënyrë reflektive dhe të qytetëruar,” thuhet në deklaratë.
Të interesuarit për të marrë pjesë në këtë garë, mund të paraqesin kërkesën e tyre deri më datë 02/07/2017, ndërsa zgjedhjet do të zhvillohen me datë 22/07/2017.
