“Bashkëpunim konstruktiv dhe të dobishëm për një proces solid e kushtetues për negociata sa më të suksesshme”, -kështu ka deklaruar kreu i shtetit, Ilir Meta, teksa ka komentuar dhënien e plotfuqishmërisë për negociatat me Greqinë për paktin detar.
Reagimi i Metës vjen vetëm një ditë pasi firmosi plotfuqinë për negociatat me Greqinë.
“Besoj se tashmë kemi realizuar një bashkëpunim mjaft konstruktiv dhe të dobishëm, për të pasur një proces solid e kushtetues, por edhe tekniko ligjore për negociatat sa më të suksesshëm. Unë besoj se është bërë një punë mjaft e konsiderueshme dhe jemi në një proces solid nga pikëpamja kushtetuese”- tha Meta, në një prononcim për gazetaret pas aktivitetit për bektashinjtë.
Meta është pyetur edhe për emrin e negociatorit të ri të shtuar me palën shqiptare, atë të Ksenofon Krisafit.
“Ka qenë një propozim shumë pozitiv dhe mjaft i mirëpritur nga ana ime, pasi është një personalitet me mjaft eksperiencë në drejtësinë ndërkombëtare”- tha Meta.
