Situata emergjente e krijuar pas bllokimit të aktivitetit ekonomik në vend, si rrjedhojë e kufizimeve në lëvizjeve për të frenuar përhapjen e koronavirusit, ka shkaktuar probleme të shumta në aktivitetet e përditshme të bizneseve dhe konsumatorëve.
Kryeministri Rama tha se një paketë financiare mbështetëse do të jetë gati brenda ditës së enjte. Mësohet se të gjitha ministrive u është kërkuar që të japin propozimet e tyre për situatën. Një prej masave të propozuara nga Ministria e Industrisë dhe Energjisë do të jetë pezullimi i kamatëvonesave për pagesën e energjisë elektrike për të gjithë periudhën e karantinës.
Gjatë ditës së sotme, në sportelet e Operatorit të Shpërndarjes së Energjisë Elektrike (OSHEE) ka pasur radhë për të paguar faturat e dritave, pasi konsumatorët i trembeshin kamatëvonesave. Megjithatë burimet nga Ministria pohojnë se ritmi i arkëtimeve është në tkurrje të ndjeshme dhe kjo mund të krijojë probleme likuiditeti në të ardhmen për blerjen e energjisë nga importi dhe sigurimin e energjisë.
Ndonëse nuk do të jetë e shkruar zyrtarisht mund të ketë tolerancë për të mos prerë dritat për familjet që nuk kanë paguar energjinë, por vetëm për familjet, jo për bizneset.
Situata e krijuar me koronavirusin lë pezull dhe planet e tjera, si ai për liberalizimin e tregut të energjisë për bizneset.
Kryeministri Edi Rama ka pohuar se të enjten do të jetë gati plani i garancisë financiare për kompensimin e pagave të munguara të çdo biznesi.
Kufizimi i lëvizjeve i nisur që të hënën e kaluar dhe i përshkallëzuar ditë pas dite ka çuar në mbylljen e shumë aktiviteteve, sidomos atyre tregtare, ndërsa shumë punonjës, sidomos në sektorët e fasonit rrezikojnë të mos marrin rrogat dhe kjo mund të krijojë vështirësi në shlyerjen e faturave të përmuajshme./Monitor
