Shfaqjet kulturore kanë shënuar një rënie drastike krahasuar me një vit më parë. Sipas një raporti të publikuar nga INSTAT, numri i shfaqjeve kulturore në tremujorin e dytë të 2017-ës ka shënuar rënie me 21,1%, krahasuar me tremujorin e dytë të 2016-ës.
Ndërkohë, ndryshe nga numri i shfaqjeve kulturore, numri i spektatorëve (54 mijë në tremujorin e dytë 2017) ka shënuar rritje me 34% krahasuar me një vit më parë.
Pjesëmarrja mesatare në tremujorin e dytë 2017 është 249 spektatorë/vizitorë për shfaqje dhe ka pësuar rritje me 69,9 %, krahasuar me tremujorin e dytë 2016.
Numri i vizitorëve në muze në tremujorin e dytë 2017 është 56.375, duke shënuar rritje me 36,3 %, krahasuar me tremujorin e dytë 2016.
Në kala e monumente të tjera, numri i vizitorëve ka një rritje prej 24,3 %, midis tremujorit të dytë 2017 dhe të njëjtit tremujor në vitin 2016.
Në tremujorin e dytë 2017 numri i vizitorëve në parqe arkeologjike është 71.773, me një rritje prej 9,7 %, krahasuar me të njëjtën periudhë të vitit të mëparshëm.
Numri i shërbimeve të njësive bibliotekare dhe numri i frekuentuesve të Bibilotekës Kombëtare në tremujorin e dytë 2017 është përgjysmuar krahasuar me tremujorin e dytë 2016.
Në tremujorin e dytë 2017, në Bibliotekën Kombëtare janë afishuar 3.322 botime, 1,0 % më shumë në krahasim me të njëjtën periudhë të vitit të kaluar. Nga këto botime 661 ishin tituj të rinj dhe 2.661 ekzemplarë të rinj.
