Një burrë është arrestuar pasi hyri në katedralen e Shën Patrikut në New York, teksa mbante në duar bidona me benzinë. Personi që ka rënë në pranga është identifikuar si profesor i filozofisë, Marc Lamparello.
Teksa hynte në katedrale, ai është përballur me një oficer të sigurisë, i cili e pyet se ku po shkon dhe e njofton se ai “nuk mund të vazhdojë në katedrale me këto gjëra”.
Gjatë këtij momenti, disa pika benzine kanë rënë në dysheme, teksa personi kthehej për t’u larguar.
Më pas, siguria njoftoi oficerë nga Byroja kundër terrorizmit të cilët ishin duke qëndruar jashtë. Policët kanë arrestuar menjëherë personin në fjalë, pasi e kanë marrë në pyetje.
Justifikimi i tij ishte se po kalonte nga katedralja për të shkuar në Madison Avenue, pasi makina e tij nuk kishte karburant. Policia ka bërë një verifikim, dhe pasi ka parë që automjeti në të vërtetë kishte karburant, e ka arrestuar të dyshuarin.
Nuk dihet ende qëllimi i saktë i tij, por dyshimet kanë qenë për vënien e zjarrit, pasi ai mbante katër litra benzinë, dy shishe me një tjetër lëndë djegëse dhe çakmakë.
Kjo ngjarje vjen pak ditë pas zjarrit shkatërrues në katedralen e Notre Dame, por fatmirësisht çdo incident i mundshëm ka arritur të parandalohet./ Përshtati Tirana Today
