Zv/kryeministri i Kosovës, Behgjet Pacolli është takuar me zyrtaren e lartë të BE-së, Federica Mogherini.
Pas takimit, Pacolli ka dhënë disa informacione me anë të një postimi në Facebook, ku shkruan se “Mogherini ndau vlerësimin se liberalizimi i vizave është hapi vendimtar, që duhet kryer tani sepse ndikon fuqishëm në perspektivën e të rinjve kosovarë”.
Më tej, Pacolli zbulon se në takim është diskutuar edhe mbi fazën e re të dialogut për normalizimin e marrëdhënieve mes Kosovës dhe Serbisë.
POSTIMI I PACOLLIT:
Përfundova vizitën time në Bruksel me takimin shumë pozitiv dhe shpresëdhënës me numrin një të diplomacisë së Bashkimit Europian, znj. Federica Mogherini. Ajo ndau vlerësimin tim se “liberalizimi i vizave është hapi vendimtar, që duhet kryer tani sepse ndikon fuqishëm në perspektivën e të rinjëve kosovarë, që janë të edukuar mirë, me mendje të hapur dhe për një Kosovë me frymë të re evropiane”. Diskutuam edhe për fazën e re të dialogut për normalizimin e plotë të marrëdhënieve në mes Kosovës dhe Serbisë; perspektivën e përgjithshme evropiane; përmbushjen e agjendës evropiane, bashkëpunimin rajonal si ai i Procesit të Berlinit dhe tema të tjera.
