Shqipëria dhe Kosova nënshkruan sot marrëveshjen ndërministrore për bashkim të përfaqësive diplomatike e konsullore, dhe për bashkëpunim strategjik në fushën e politikës së jashtme. Marrëveshja u firmos nga Ministrat e Punëve të Jashtme të dy vendeve, Gent Cakaj dhe Behgjet Pacolli. Në konferencën e përbashkët për median, Cakaj sqaroi se marrëveshja konsiston në katër shtylla kryesore; politike, diplomatike, profesionale dhe kulturore.
Ministri i Punëve të Jashtme të Kosovës, Behgjet Pacolli, tha se kjo ishte një ide e hershme, për përfaqësi të përbashkëta, e faktori kohë dha rezultatet konkrete.
“Idesë duhet ti vijë edhe koha, që kjo ide e hershme e bashkëpunimit ka ardhë. Ideja është shumë e fuqishme. Do kontribuojë dy vendeve, Kosovës…. Kosova ka nevojë për ndihmën e Shqipërisë. Kosova ka nevojë për mbështetjen e njerëzve me eksperiencë, që sot kontribuojnë në marrëdhëniet e Shqipërisë me vendet e tjera.
Jam tejet i lumtur që sot nënshkruam këtë marrëveshje, dhe nga tani do punojmë në interes të dy vendeve. ‘De jure’ do punojmë dhe do të shihni se rezultatet do jenë më të mëdha. Jetojmë në një kohë tjetër, kur politika ka ndryshuar interesat, dhe tani duhet ti adaptohemi këtij realiteti.
Adaptimi ynë fillon edhe nga kjo marrëveshje dhe ne do jemi në vendet kur s’kemi qenë prezentë deri tani”, tha ai në një konferencë të përbashkët për median, me homologun Gent Cakaj.
