Kryeparlamentari Gramoz Ruçi shprehet se zgjidhja e krizës politike në vend mund të arrihet vetëm përmes dialogut, por pa shkelur vijat e kuqe të tij.
Në takimin e tij me ambasadoren gjermane, Susane Schutz, me rastin e përfundimit të misionit të saj në Shqipëri, Ruçi tha se Kuvendi i ka krijuar të gjitha mundësitë që opozita të bashkëpunojë sa i përket reformave.
“Zgjidhja mund të vijë vetëm nëpërmjet dialogut, por pa shkelur vijat e kuqe të këtij dialogu, të cilat janë Kushtetuta e ligji dhe pakthyeshmëria e reformës në drejtësi. Gjithashtu Kuvendi ka krijuar të gjitha mundësitë që opozita parlamentare dhe joparlamentare të bashkëpunojnë për vazhdimin e reformave, përfshirë edhe reformën në drejtësi” deklaroi Ruçi.
Ruçi i shprehu përgëzimet ambasadores Schutz për kryerjen me sukses të misonit në Shqipëri. Ai uroi gjithashtu edhe zgjedhjen e Ursula von der Leyen, në krye të Komisionit Evropian.
“Gjermania është lokomotiva ekonomike dhe politike e Europës, një magnet i fuqishëm për të gjithë popujt dhe vendet që aspirojnë për liri, demokraci e mirëqenie. Shqipëria i është mirënjohëse Gjermanisë për mbështetjen gjatë gjithë tranzicionit, por në mënyrë të veçantë për mbështetjen e fuqishme të proceseve integruese. Ne u jemi thellësisht mirënjohës Kancelares Merkel dhe Presidentit të Bundastagut Shauble dhe jemi të bindur se rekomandimi i Komisionit Europian për hapjen pa kushte të negociatave nuk do të ishin të mundura pa mbështetjen e Gjermanisë, të Qeverisë dhe Bundestagut. Këtë mbështetje e konstatova edhe gjatë vizitës zyrtare në Gjermani dhe takimit me Presidentin Shauble dhe ministrin për Çështjet Evropiane Roth. Shqipëria shpreson në vazhdimin e mbështetjes së Gjermanisë edhe në mbledhjen e Këshillit Evropian në tetor të këtij viti”, u shpreh Ruçi.
