Bashkëkryetari i Komisionit të Reformës Zgjedhore, Damian Gjiknuri deklaroi dje në përfundim të takimit të Këshillit Politik se është rënë dakord që reklamat elektorale të lejohen gjatë edicionit të lajmeve.
Mirëpo, ambasadori i OSBE-së, Bernd Borchardt është shprehur kundra këtij vendimi. Në një takim me përfaqësues të një grupimi partish opozitare parlamentare dhe joparlamentare Borchardt, i nxiti ata që të konsideronin shfuqizimin e nenit 84.1 të Kodit Zgjedhor dhe të ndalohet në mënyrë të qartë transmetimi i reklamave politike në lajme.
“Mediat duhet të jenë në gjendje të mbulojnë në mënyrë të pavarur aktivitetet e subjekteve zgjedhore garuese, me qëllim kufizimin e përdorimit të kronikave të prodhuara nga vetë partitë politike në edicionet e lajmeve dhe për të shmangur keqorientimin e zgjedhësve. Në çdo rast që media përdor materiale të prodhuara nga partitë politike, ato duhet të etiketohet qartësisht si të tilla”, tha ai.
Ambasadori i OSBE kërkoi nga pjesëmarrësit në takim që të mbështetin zbatimin e rekomandimeve të OSBE/ODIHR-it, në procesin e reformës zgjedhore.
“Të gjitha partitë garuese në zgjedhje duhet të kenë akses të barabartë në media. Mund të shihet, gjithashtu, mundësia për t’u dhënë të gjitha subjekteve zgjedhore një kohë të caktuar falas”, shtoi ai.
