Dalin të tjera detaje në lidhje me operacionin “Kuito”, ku në kuadër të të cilit u sekuestruan 137 kg kokainë.
Sipas BalkanWeb, mësohet se pjesë e këtij hetimi janë bërë edhe zyrtarë të portit të Durrësit. Dyshohet se këta zyrtarë mund të kenë krijuar mundësitë për hyrjen e personave të paautorizuar në ambientet e portit të Durrësit.
Gjithashtu bëhet me dije se grupi hetimor ka marrë edhe pamjet filmike për hyrjet dhe daljet në port, për të vëzhguar çdo lëvizje që mund të konsiderohet e dyshimtë. Autoritet greke zbuluan në Portin e Pireut sasinë e madhe të kokainës, që vinte nga Ekuadori me destinacion final shtetin shqiptar.
Droga ishte fshehur në motorët e frigoriferëve në katër kontenierë me banane, të porositura nga një kompani shqiptare, e cila operon në treg nga viti 2011. Ndërkohë, pas zbulimit, autoritetet vendosën ta zëvendësonin drogën me oriz, në portin e Pireut, ku kontenierët po kalonin tranzit.
Kur ngarkesa mbërriti në Durrës, skuadra operacionale i mbajti nën vëzhgim kontenierët. Përgjatë katër ditëve fotografuan dhe filmuan lëvizjen e disa personave të dyshuar si pritësit e drogës. Prokuroria zbuloi se personi kyç në linjën e trafikut ishte Gentian Malindi, pronari i një anije peshkimi, i skeduar më herët për trafik hashashi. Bashkëpunëtorë të tij ishin oficeri i sigurisë në port, Ardian Bega dhe Altin Mislihaka.
