Opozita do të mbajë javën e ardhshme më 13 maj, një protestë masive në bulevardin “Dëshmorët e Kombit”, për të kërkuar zgjedhje të lira dhe të ndershme.
Protesta do të ketë formën e një marshimi kolektiv, e ngjashme me atë që ishte parashikuar në qytetin e Kavajës, por që opozita e anuloi për shkak të tërheqjes së kandidatit të Partisë Socialiste për këtë bashki, me urdhër të kryeministrit Rama.
Sipas kreut të Partisë Demokratike, Lulzim Basha kjo protestë përbën simbolikën kryesore të revoltës së opozitës ndaj pushtetit të inkriminuar, i cili sipas tij, nuk lejon zhvillimin e zgjedhjeve të lira dhe të ndershme.
Për këtë arsye, kreu i selisë blu, mblodhi ditën e sotme krerët e partisë në rrethe me qëllim organizmin e protestës së radhës me kauzën për të krijuar qeveri teknike që sipas Bashës, do të mundësonte zgjedhje konform standardeve evropiane.
Në mbledhjen e Bashës me krerët e degëve të PD-së që u zhvillua me dyer të mbyllura morën pjesë edhe dy nënkryetarët Edmond Spaho dhe Edi Paloka, sekretari i përgjithshëm Arben Ristani, sekretari organizativ Enno Bozdo si dhe sekretari i burimeve njerëzore në PD, Fatbardh Kadilli.
Më herët kreu i PD-së, Basha iu bëri thirrje nga çadra qytetarëve që të bashkohen në protestën e javës së ardhshme.
“Dialogu do të ketë sukses kur bashkimi më i madh i shqiptarëve javën e ardhshme në këtë bulevard, do të marshojë këtu, ku shqiptarët nuk do të pranojnë zgjedhje të dominuar nga krimi dhe pa opozitën. Të vetmet zgjedhjet që ky vend do të mbajë do jenë zgjedhjet të çliruara nga krimi dhe krijimin e një qeverie teknike që do të realizojë zgjedhje të lira dhe të ndershme.
Ju keni arritur atë që nuk e keni arritur në 3 vite e gjysmë, nuk ia arriti ta bëjë as opozita. Mos e harroni këtë. Unë e di fare mirë. E kam ditur forcën e bashkimit të bashkëqytetarëve të mi dhe e shoh dritën e parë të Republikës së Re në sytë e fëmijëve, burrave dhe grave. Kjo ditë po vjen dhe askush nuk e ndal dot. Dita e Republikës së Re do të vijë kur qytetarët do të kenë në duart e fatin e tyre. Zoti është me të drejtën, është me shqiptarët. Kjo dritë do të vijë edhe më parë sa më shumë të jemi dhe sa më të bashkuar të jemi për t’i dhënë fund Republikës së Vjetër. I bëjmë thirrje çdo burri dhe gruaje, të riu e të e reje që të bashkohet në marshimin e javës së ardhshme, për të arritur zgjedhje të lira e të ndershme dhe për të sjellë Republikën e Re që po agon”, u shpreh paraditen e sotme, kreu i PD-së.
