Aleatët e Bashës mbajnë qëndrime të ndryshme për sa i përket pozicionit të LSI-së në opozitë dhe koalicionit të së djathtës.
Kreu i LZHK-së, Dashamir Shehi shprehet se koalicioni opozitar nuk është në opozitë sepse nuk është në qeveri, por sepse do të jetë gjithnjë përballë se majtës, ndryshe nga LSI-ja, e cila bashkëqeverisi me PS-në në mandatin e shkuar.
“Ne, ndryshe nga LSI, nuk hyjmë me PS-në në qeveri dhe ky është një ndryshim i madh. Ne nuk jemi në opozitë kur nuk jemi në qeveri, ne jemi gjithmonë në opozitë kur përballë kemi të majtën. Këtu bëhet dallimi mes së majtës dhe së djathtës, jo dy ndërmarrjeve”, sqaron Shehi për Panorama.al.
Por, Agron Duka, kreu i PAA-së nuk tregohet kritik, teksa shprehet se prezenca e LSI-së në koalicionin opozitar nuk duhet parë si një pengesë, por si një kontribut për të arritur qëllimin, që është largimi i qeverisë:
“Mua personalisht nuk më shqetëson prezenca e LSI-së në koalicionin opozitar. Për ne, sa më shumë individë dhe forca politike të na bashkohen, aq më mirë është për realizimin e qëllimit tonë, që është largimi i kësaj qeverie. Interesi ynë politik është largimi i qeverisë dhe çdo faktor që na mundëson arritjen e këtij qëllimi, është i dobishëm”, thekson Duka.
