Grupi demokrat i opozitës parlamentare ka dalë me një propozim të ri në mbledhjen e sotme të Këshillit të Legjislacionit dhe Komisionit të Ligjeve.
Korab Lita, Myslim Murrizi dhe Rudina Hajdari kanë kërkuar një ulje të pragut zgjedhor në 2%. Sipas Litës, një prag 5% bashkë me ndalim koalicionesh thellon hendekun e partive me votuesit. Propozimi i tij u mbështet më pas nga Murrizi dhe Hajdari.
“Pragu 5% dhe ndalimi i koalicioneve ngushtojnë hendekun. Pragu 2% e plotëson më së miri nevojën e shfaqur. Propozoj që në pikën 2 të nenit të parë, të bëhet jo më pak se 5% të votave të vlefshme por 2% të votave të vlefshme”, tha Lita
“Edhe unë mbështes propozimin e relatorit në emër të opozitës. Që paragrafi 2 i nenit, të ndryshojë pragu. Në propozimin fillestar ka qenë 5%. Por në ndonjë mbledhje tjetër të merret parasysh që të ndryshohet nga 5% në 2%”, u shpreh Murrizi.
“Propozimi i pragut zgjedhor 5% nuk ka ardhur nga grupi demokrat, ka ardhur nga deputetë të tjerë. Ulja e pragut do ishte më e drejtë dhe do të krijonte konkurrueshmëri”, deklaroi Hajdari.
