Kryemadhi ka folur sot në bashkëbisedimin me gazetarët edhe për protestën, duke hedhur poshtë datat e përfolura në media.
Kryetarja e LSI-së pranoi që ende nuk ka një datë për nisjen e protestës, ndërsa bëri të qartë se objektivi i saj është rrëzimi i Ramës.
Po ashtu, Kryemadhi tha se po bëhet një mirëorganizim i nisjes së protestave, pasi nuk bëhet fjalë për një fillim dhe mbarim të saj.
“Objektivi i qartë, rrëzimi i Ramës. Do të bëjmë një organizim të protestës në mënyrë shumë dimensionale. Protesta tashmë ka të bëjë me mbijetesën e familjes shqiptare. Të jeni të bindur që do të jetë një nga protestat më të mëdhaja, akoma nuk kemi vendosur për datat, por do të jetë fillimi i një lëvizje të mirë-organizuar opozitare e cila do të ketë një finale. Nuk është çështje çadrash, por do të ketë një fillim dhe nuk dihet kur do të ketë mbarim”, tha Kryemadhi.
Ndër të tjera, kryetarja e LSI-së, Monika Kryemadhi u është përgjigjur akuzave të Ramës se partia e saj ka bllokuar reformën dhe se ka frikë nga drejtësia.
Pyetje: Në Asamble, Rama e rreshtoi LSI-në në bllokuese të reformës, pse partia juaj ka frikë nga reforma nëse është ashtu siç thotë Rama?
Zoti Rama në fakt duke qenë se është frikacak vet, mendon se të tjerët janë frikacakë. Unë i them se LSI nuk është parti e frikës dhe aq më pak unë. Shumë shpejt mund të jetë një i pandehur për drejtësinë, ka pafundësisht gjëra për të pasur frikë.
Pyetje: Keni prova që mund të dërgojnë Ramën si të pandehur?
Sa të duash ka prova, por ne kemi dorëzuar një akt padi në prokurori, pasi ai ka bërë thirrje për grabitjen e votave LSI-së. TIRANA TODAY
