Kryeprokurori Olsian Çela është shprehur se niveli i krimeve në të gjithë vendin, për vitin 2019 është ulur me 3% në krahasim me vitin 2018.
Gjatë fjalës së tij në mbledhjen e Komisionit të Ligjeve, Çela tha se gjatë këtij viti janë regjistruar gjithsej 44,289 procedime penale.
Sipas tij, gjatë vitit 2019 niveli i kriminalitetit në Shkodër është ulur. Në këtë qytet janë kryer një seri vrasjesh të bujshme, disa prej të cilave janë zbardhur, ndërsa një pjesë janë në shqyrtim.
Në vitin 2019, numri i përgjithshëm i miratuar i prokurorëve ishte 336. Shpërndarja e tyre në prokurori sipas niveleve ka qenë, 291 prokurorë në prokuroritë pranë gjykatave të shkallës së parë, 28 prokurorë në prokuroritë pranë gjykatave të apelit dhe 17 prokurorë në Prokurorinë e Përgjithshme. Ndërkohë, për shkak të vakancave numri faktik i prokurorëve ka qenë 309.
