Trazirat e ndodhura pasditen e sotme tek Partizani duket se nuk do të kalojnë aq lehtë, ku Starova dhe Trashi kanë debatuar me tone të ashpra. Madje debati agravoi aq shumë sa “Bobo” urdhëroi largimin nga hoteli të mesfushorit gramshiot. E gjitha kjo ndodhi gjatë ndeshjes miqësore që zhvilloi sot Partizani me ekipin gjerman Berliner.
“Sherrin” Starova-Trashi ka sjellë jehonën e tij deri në Tiranë, ku duket se Olsi Rama ka thirrur në një mbledhje urgjente drejtuesit e bordit të klubit që ndodhen aktualisht këtu. Sipas “BalkanWeb” ky takim urgjent është bërë për të marrë një vendim për mesfushorin Trashi, i cili me shumë gjasa do të marrë një dënim. Parashikohet që të jetë një pezullim, por që mund të jetë largim përfundimtarë nga klubi edhe pse lojtari ka vite që luan për të kuqtë dhe ka qenë gjithmonë një nga elementet kyçe. Gjithsesi pritet të mësohet se cili do të jetë qëndrimi i klubit në lidhje me të ardhmen e lojtarit, i cili ka vite që një ndër futbollistët më të rëndësishëm për Partizanin.
