Në kundërpërgjigje të deklaratave të kryeministrit Rama, i cili e konsideroi një “horr” ish-oficerin Emiljano Nuhu, ish-kryeministri Berisha e vë përballë një përgjegjësie të fortë, teksa publikon një listë të gjatë diplomash e certifikatash të ish-oficerit.
Berisha ka ndarë me të gjithë ndjekësit përmes profilit të tij në Facebook, një sërë certifikatash të Nuhut, vulosur nga partnerët amerikanë dhe evropianë, për grada e trajnime.
Një ndër certifikatat Nuhut i është dhënë nga Pameca, për trajnimin me temë: “Drejtuesit e agjentëve të infiltruar”. Po ashtu një tjetër certifikatë i është dhënë Nuhut në 2013-n, nga Departamenti i Drejtësisë të Shteteve të Bashkuara të Amerikës në Shqipëri. Emiljano Nuhu ka marrë dhe një sërë certifikatash vulosur nga krerët e institucioneve policore shqiptare.
Duke publikuar një sërë certifikatash, si për ironi, Berisha shkruan se ky është Emiljano Nuhu, që Rama e quan horr. Ndër të tjera, ish-kryeministri nënvizon se oficeri i policisë është një nga heronjtë e vërtetë të Policisë së Shtetit, ndërsa rendit 9 diplomat, certifikatat, vlerësimet shqiptare dhe ndërkombëtare të tij. Berisha nuk nguron që ta cilësojë si një hero të vërtetë para ligjit, dhe në detyrat e tij.
Një ditë më parë, Rama foli për vajzën e dhunuar, duke u shprehur se ajo meriton vetëm drejtësi. Po kështu ai ka qenë i drejtpërdrejtë edhe në lidhje me oficerin Nuhu, të cilin e cilësoi një horr.
“Një horr i kthyer në hero, ka braktisur detyrën dhe ka përdorur rastin për të fituar azil. Nuk do t’i ndahemi atij horri”, tha Rama.
