Kryeministrja britanike, Theresa May i jep mbështetjen e saj ambasadorit të Britanisë në Shtetet e Bashkuara të Amerikës, pasi Donald Trump deklaroi se nuk do të punojë më me të.
Ky vendim nga ana e Trump erdhi si pasojë e e-maileve të publikuara në gazetën britanike “The Mail”, që tregonin se ambasadori Kim Darroch e cilësonte administratën e Trump si të paaftë.
Trump, në disa postime në Twitter, e ka kritikuar Theresa Mayn se ajo e futi në një rrëmujë, procesin e daljes së Britanisë nga BE-ja. Nga ana tjetër, May e cilësoi si të pavend rrjedhjen e këtyre e-maileve, duke theksuar se Britania dhe SHBA do vazhdojnë të kenë një marrëdhënie të veçantë dhe të qëndrueshme.
Më tej, në deklaratën e kryeministrisë britanike thuhet se e mbështesin Kim Darroch, pasi besojnë se ambasadorët duhet të japin vlerësime të qarta për politikat në vendin e tyre.
Një ditë më parë, Trump deklaroi se nuk e pëlqen ambasadorin britanik dhe se sipas tij, ai nuk ka punuar ashtu siç duhet.
